世盃後首個國際賽檔期，就好似一面照妖鏡。歐國聯係列強練靶場，又可變成C朗被逼走嘅政治騷。巴西一眾球星要深入印度加爾各答友賽，賺取500萬美元戲金。南美各路大軍漫無目的，遠赴日韓陪練當度假，所以仲肯置身其中傾盡全力踢太公波，唔使借機會喘息嘅球星，最值得致敬。已轉戰美職嘅「波蘭之寶」羅拔利雲度夫斯基，38歲仲喺鬥羅馬尼亞入3球兼踢足全場。綽號阿KING嘅哈利卡尼仲厲害，呢位已係四子女之父嘅33歲三獅殿堂級射手，連同喺拜仁季初連踢10場，其中9場正選8場入波，包括近3場歐國聯為三獅全部擔正場場士哥；一部唔識停嘅老牌入球機器，本周六又會再喺德甲亮相，開季之後，究竟佢有幾多機會見下屋企人？
今個國際賽期壓軸出場嘅真正阿KING當然係美斯，球迷對阿根廷國家隊嘅喜惡一向兩極；但對呢位為國鞠躬盡瘁、踢美職從冇欺場嘅真球王，睇佢喺世盃波衫銷量No.1就知歡迎程度。今次嚟到國家隊終章，獲最高規格嘅告別賽作致敬，相信可見將來，世界球壇後來無者。