「豐」雨同路—— 油麻地戲院

 「行行企企食飯幾味！」昔日除咗搵食就係行街同睇戲。直至經濟增長，開始講究娛樂享受而離不開追求「活色生香」。而呢個「活」字正正係港人嘅生活關鍵字！

香港匯萃東西文化，既是華文社會又是國際城市，電影由落地草根到走入國際，承傳西方而闖出東方，曾經影響東南亞及台灣嘅電影發展，光影軌跡引證香港再不是一個文化沙漠，從此有華人的地方就有「港產片」。

字詞中，諧音取其義
舊時睇「港產片」當然要去戲院，以前大型戲院設計都參考西方歌劇院規格；不過早期主要表演劇目皆以梨園戲曲大戲為主，所以早期「戲院」又稱為「戲園」。而勞動人口多集中嘅油麻地則有五大戲院，分別名為廣智、第一、大華、光明及油麻地。

油麻地為人之熟悉莫過於果欄及戲院，其黃金年代正為香港電影全盛時期，主要院線為「邵氏」、「金公主」及「新藝城」，後期競爭力不及小型電影院，油麻地戲院早場唯有增設早場播放國際「愛情動作片」，尤其早期日活院線之歐美日片，及後更獨創一票全日睇嘅「連環場」；加上其「低俗抵死」嘅戲名，《豐乳同露》、《借叔一簫》等，更成為街知巷聞嘅趣味話題，油麻地戲院可謂發揚香港文化及廣東話嘅精髓，而戲院亦於1998年以「鹹片」作為一代歷史任務之結束。

時代中，活化取其貌
同年古物諮詢委員會將這建於1930年之戲院評為二級歷史建築，而2009年「活化」嘅油麻地戲院被改成為有300個座位，並於於2012年成為「戲曲中心」。不遠處上海街嘅紅磚屋，亦於2000年獲評為一級歷史建築，修復後變為戲曲排練和培訓之用，奈何兩者歐式建築用作中式使用，舊有設計難免有所犧牲。有幸這於1895年落成本為抽水站，其紅牆身、鐵鑄雨水管、鐵鑄收水斗、拱形走廊及花崗石細部結構得以保留。縱然先後改作郵政局、小販管理署及路宿者之家等用途，經歴百多年歲月，仍不失時代韻味。

改變中，兩害取其輕
不過戲曲中心改建相對較大，原本建築空間結構不再，亦失去原有古典風格特色及Art Deco味道，原來三角形屋頂與劇院坐位之間，被新增嘅舞台裝置隔開，使原來面積不大嘅戲院內部更感狹窄；加上大堂入口石柱分別刻有代表哭和笑之面譜，西式售票處和冷氣大堂，都與果欄感覺格格不入，不算華麗也不叫樸實。

由始至終，油麻地戲院都走大眾路線，不論早期舞台戲曲年代，到之後國粵語電影長片，或曾經大行其道嘅港產片黃金歲月，不論高雅低俗活色生香都曾經其門如巿，與變格中的油麻地一同風雨同路。