世界盃開鑼喇！但喺膝頭哥呢個小小世界裡，ACL(前十字韌帶)負責中場，係球隊入面嘅主帥。佢由大腿股骨後外側，「駁腳、傳中」到小腿脛骨前內側，主力攔截脛骨向前推進，擔起咗穩住膝關節嘅防守角色，俾前鋒嘅四頭肌趁機射波入網。
點知喺上半場就嚟完之際，ACL為咗接應隊友開出嘅角球，跳起落地時扭到膝頭哥，當場「啪」一聲瞓喺草地。球證翻睇慢鏡，見唔到對方球員同膝頭哥有任何肢體碰撞，證實係非接觸性創傷，所以唔使出黃牌警告。其實頭先嗰吓「啪」聲，係ACL斷裂嘅時候，膝關節移位所發出嘅聲響，就好似球證吹罰越位咁飲恨。
但今次ACL中途受傷離場，搞到膝頭哥開始陣腳大亂，一來膝關節會發炎同產生積液而伸直唔到，二來前鋒四頭肌會避免發力而行路趷腳。正如VAR(視像助理裁判)用嚟判決個波有冇出界一樣，要證實ACL仲可唔可以踢落去，我哋需要照MRI(磁力共振)去評估佢嘅傷勢，同埋檢查其它軟組織有冇受損，例如係半月板或兩側副靭帶撕裂等。如果MRI照到ACL係嚴重撕裂或者完全斷裂，為咗延續你嘅足球員生涯，就最好停賽做手術啦！唔係嘅話，膝頭哥就有機會加速勞損退化，日後想踢返波都可能有困難！
下半場開波啦，但移師咗去手術室嗰度踢！醫生話完全斷裂嘅ACL無得靠修補嚟留低，但可以做重建手術，搵其它肌腱去取代。而入替佢嘅後備球員，正正係大腿後側嘅股薄肌同埋半腱肌肌腱。醫生會先由切口抽取佢哋，將佢哋好似「插花」咁用針線編織成一條，然後透過關節鏡移除斷裂咗嘅ACL，再喺股骨同脛骨鑽隧道，俾移植嘅肌腱通過，最後用生物可吸收螺絲固定。成個手術就好似組織一場入波，先計算好角度同射程，將植入嘅肌腱，喺股骨同脛骨之間嚟一次「三角短傳」，穿過股骨髁間窩呢個「龍門」嘅時候，只要無擦柱或中橫樑，咁就等於入咗球「世界波」啦！
場波仲未踢完，唔好咁快開心住！做完重建手術，只係同先輸一球嘅ACL斷裂追成平手，大家仲要沉住應戰「加時」多6至9個月，去接受復康治療，先可以再次上場搓波。術後太早踢返波，移植嘅肌腱就有機會整鬆返或受損。原來醫生並唔係「揼波鐘」，而係驚你再次受傷，要提早掛靴，將來唔可以入選國家隊，係世界盃上實現零的突破，背後原因令人暖心！
作者為骨科專科醫生