有時候，真係忍唔住笑。
將於11月19日迎接55周年紀念的無綫電視，近日又「派花生」，而且較服務44年的「Do姐」鄭裕玲不再續約、「MK活地亞倫」葉念琛自編自導的台慶劇《美麗戰場》大結局播出後遭人瘋狂「問候」兩件事更震撼。
事緣大台「小編」(帳戶管理者)日前在社交網絡LinkedIn忽然「爆Seed」(撰文時網站顯示為一星期前，即10月底發帖)，話題圍繞另一套台慶劇《下流上車族》首播收視高開(10月17日第一集平均直播收視達22.5點，第二周再升至23.2點)，配合一張寫有「匪夷所思」四個字的圖片(相中見到一位架起眼鏡的女生面露驚訝神色)，以「訓導主任教仔Mode」的語氣和大量專業辭彙，反問廣大Marketers(市場營銷人員)三條問題：「點解CPRP(收視點成本)貴到咁都仲要買？」「點解Ratings(收視率)咁高都睇唔到？」「點解Marketers唔要高ROI(投資回報率)？」之後再「加辣」送多幾句：「而另一個電視台同一時段嘅收視係3點，計落CPRP比TVB貴994%！！如果你係Marketers，你會點揀？唔通你真係唔使同老闆交代？」雖然沒有點名，但全宇宙都知，內文所指的「另一個電視台」其實就是ViuTV。
LinkedIn專業人士之地
帖文發表數日後，給業內人士發現並廣傳，一傳十，十傳百，再經不同主流媒體和網媒「接力」報道，很快就成為全港笑話，令大台企業傳訊部周三(11月2日)需要用另一篇帖文回應事件，強調「事件無意針對任何人、亦不存在攻擊廣告業界之說」，結果毫無幫助，外界「笑聲」更大。用「笑話」來形容絕不誇張，因為今次「案發現場」並非在Facebook，而是LinkedIn，前者走大眾路線，乜人都可以睇，乜人都可以講，後者屬於職場主導的社交網絡，基本上所有「開戶者」都是希望透過這個平台to see and be seen，公司發掘合適員工，邀約面試甚至加盟，打工仔則冀能找到機會跳槽。
使用目標如斯明確，是故一般情況下，LinkedIners絕不介意公開自己的樣貌、學歷和職場經驗，不然怎會給人看見？亦正因如此，LinkedIn從來都是專業人士匯聚之地，卧虎藏龍無數，使用門檻明顯較Facebook高很多，帖文受歡迎與否，與帳戶本身的實力(個人或企業的名氣及形象)攸關。今次大台竟然夠膽在LinkedIn公開斥責客戶不落廣告，實在令人匪夷所思，相當肉酸，難怪很多網民都在帖文留言繼續dislike：「你可以繼續掩耳盜鈴，自圓其說，但係呢度係LinkedIn，唔係Facebook，用得呢度嘅人唔係話你出個聲明就可以打圓場㗎」、「貴公司態度同貴公司劇集《大時代》既(嘅)丁蟹一模一樣，千錯萬錯都係人地(哋)錯，總之自己就啱晒」(更多精彩留言歡迎讀者自行細閱)。
大台觀眾非目標
今次事件既反映現時將軍澳電視城營業部的「餓客」程度非常嚴重，才會逼得一班前線需要這樣「搲爛塊面」，公開發爛渣，亦可以看到今時今日仍然在大台打工的人，尤其是位處中高層的話事人，真的離地得要命，好像身處另一個時空，完全不理解/不知道外面世界發生甚麼事。
為何大台長期高收視但客戶落廣告意欲低？不外乎是品牌覺得，大台自家產品(電視節目)的觀眾群並非他們需要接觸的目標群眾。另一點更重要，是大台的品牌形象(Brand Image)給予別人怎樣的感覺──亦即Image Association，形象聯繫，電視頻道定位和節目彰顯品味為何，就如當年大家笑人睇亞視「很cheap」一樣──假若客戶認為在翡翠台落廣告只會惹來消費者負面觀感，完全抵銷廣告宣傳後帶來的正面品牌觀感和實際收入，何解要搬石頭砸自己的腳？無必要花錢買風險啊！何況來到今天，香港好歹都仍然是自由市場，客戶絕對有權選擇和誰合作。誠心建議大台與其聲大夾惡話人，不如認真反省一下，有何地方做得不好，才會落得今天這地步。