熱熱鬧鬧行曼城Sale市集

又到聖誕！又到聖誕！天氣凍行巿集特別有feel。在香港時都鍾意行巿集，特別喜歡那些小攤檔買的貨品就是與別不同，不是連鎖店款式。來到英國就更加多巿集可逛，不同地區都會有舉行。

我關餅氏最經常逛的是在Sale的Makers Market，事關每個星期日都跟成班街坊在該區返教會崇拜，之後就會去town center食晏，而每個月的第三個星期日，Sale的Stanley Square及School Road就會擺滿攤檔，每次我都會去八下，就算唔買睇下都開心。很多人都會拖男帶女，又或者全家出動，有些人更帶埋狗狗來湊熱鬧，成條街人來人往。臨近聖誕，巿集就更加多人，就好似在香港行年宵市場咁旺。

Sale出名治安較好，加上校網好，成為了曼城數一數二多香港人居住的地區，所以每次在這區行巿集，都必定見到不少香港人也來趁墟。雖然Sale Makers Market規模不及曼城巿中心的Christmas Market大，但都有超過130個攤檔擺滿成條街，範圍好集中，我覺得好好行。攤檔各有特色，售賣貨品種類亦非常多，手工藝品、盆栽植物、飾物、香水、香薰蠟燭、衫褲鞋襪、玩具等等，食品如芝士、甜品、酒、咖啡豆、蜜糖等等都有，真係多到數唔晒。應節貨品當然唔少得，那些聖誕擺設、聖誕花環好搶手。而最多人排隊一定是賣熱辣辣食物的攤檔，在寒冬下要暖身嘛！

在芸芸眾多攤檔中，發現有數個香港人開的攤檔，其中一個是售賣自家設計飾物、電話殼、皮製銀包、五顏六色的皮套筆記簿，非常有心思，檔主說也會到不同地區擺巿集吸納不同顧客。今個月18號星期日Sale又有巿集舉辦，關餅氏有家人來英國過聖誕，今次一定要帶他逛逛買份聖誕禮物送給我，哈哈！