市場上存在各式走資方法。(資料圖片)
(音樂起：登登登登，或許黃金，真的太吸引……犧牲了幾多人……哪個瞎了雙眼請疾呼我……Woo oh)(字幕：本文純屬虛構，如有雷同，實屬不幸。)
上集講到，「彼人堅呃大聯盟」決定向老闆侯賽因求援找北大人幫手搞一個大麻夢，究竟點樣合作呢？
侯賽因：「阿彼，有咩貴幹？好日唔來，一定有事啦？」
彼嘉昭：「老細。關於Kelvin仔(尖頭仔英文名)隻殼，呢排個市好淡，我手上的上市公司都使咗幾千萬，吸咗唔少，個價都是頂唔住。如果要炒落去，真是要靠你強大的實力幫幫手找個內地搞虛擬幣KOL做下個勢，之後我哋轉去搞大麻，撐下Kelvin仔先得。」
侯賽因：「等我想想辦法，找上面的『鐵哥們』幫幫手。再聯。」
過了一個月，侯賽因祕書致電彼嘉昭、堅哥和尖頭仔開會，開會現場除侯賽因外，還有一老一年輕的內地人。
侯賽因：「這位是曹總，大家都識佢啦，唔使介紹，國內搞房地產搞到No.1，又搞車呀、銀行呀，生意好大。這位是Terry，他真是一個年輕才俊，清華大學研究生畢業，之後去美資公司打工，後來自己創業，搞過社交網站，購物網站，成功套現後又去搞咗隻『水幣』，之後發達，是國內好出名的幣圈KOL。今次曹總班朋友做金主，Terry做枱面上老細，想幫你買咗隻殼，但因為錢在內地匯唔出來，想走走資，曹總又唔想俾人知道佢個大名。橋王有咩好計？」
彼嘉昭：「不如咁啦，其實經過呢個月，我又吸咗Kelvin隻股唔少貨。將隻股打上五倍先，然後曹總同Terry的朋友成立一隻信託，由曹總出晒錢，Terry做信託人，利用披露的漏洞隱瞞實際金主，之後Kelvin用市價4折賣股俾信託。曹總買到股後抵押股票俾自己相熟券商，借兩成出來，等炒到深滬港通市值，用國內錢買返貨再還。我哋又借多兩成俾曹總炒下，用Kelvin賣殼的一半錢擔保。Kelvin可以收返所有錢，曹總可以唔出名及走資，又可以用Terry個名來炒下股票，我哋無風險借錢俾人收下息，真是『一雞四味』都無咁爽呀。」
曹總、Terry：「彼先生點子很好，以後我們多多合作。」
侯賽因：「就照你意思做，有咩事就搵阿誠幫幫手。」
堅哥：「今次真是翻身啦，橋王你真是好掂呀。」
尖頭仔：「中港KOL幣圈一齊合作，加埋咁多高手，真是無得輸啦，果班傻散仲唔仆埋來買我哋隻股票？」
彼嘉昭(恐嚇)：「你唔好偷跳(作者按：用人頭戶口偷偷買貨，等消息到偷偷沽出)。」(待續……)