南美足球被圍剿

分組賽講戰意，去到淘汰賽先知誰係強手！世盃暫時睇亞洲日本同非洲摩洛哥，有力喺下周末起開展嘅32強淘汰賽，破壞呢個歐洲同南美球隊嘅爭霸大派對；反而3支主辦國難得初段都係亮點，或有當中兩隊可以玩到8強。

歐洲隊以16支參賽隊對「南美六強」早已佔隊數上嘅絕大優勢下，加上南美足球水平已因區內缺乏競爭性，靠食老本輕易喺外圍賽出線，長期缺乏硬仗磨練，走到國際賽大場面出現老鼠拉龜，去年夏天美國嘅世冠盃4強席位，歐洲隊佔3隊已係重要啟示。貴為南美外圍賽二哥嘅厄瓜多爾，早前被死守嘅庫拉索悶和令人尷尬，隊波嚟緊好多十幾歲新星輪住飛奔去歐洲掘金，四年後換血再嚟過。「兩圭」表現同樣令人尷尬，連同哥倫比亞幾支南美隊都缺乏有級數嘅當打中鋒。只怕，最後生存者剩返獨靠美斯嘅阿根廷，同埋鬥心一般嘅巴西豪華兵團。淘汰賽最期待係巴西32強好有機會鬥日本，演師徒決戰；日本去年10月友賽反勝巴西3比2，今屆藍武士決心沖天，巴西要走過呢關都唔易！