傷兵多唔係失敗藉口

今屆英超有個怪現象，特多傷兵，以premierinjuries.com嘅統計，英超今屆走過三分二賽程，最多主力傷兵嘅5隊順序係利物浦、車路士、錫菲聯、曼聯同盧頓。要應付現今賽事嘅密度同強度，唔只要team A同B，仲要好似利物浦嘅高普，坐擁5大星級前鋒、又識發掘球員場上多功能同持續重用新人，先至頂得住多達10位主力入廠嘅慘況。利記今屆已有28名球員踢過1隊，曼城只用過22人，仲只得加華度爾一名傷兵；「紅藍」玩法大不同，曼城季尾例衝刺有力，不無原因。

傷兵多令新人加速上位，大利英超健康發展；但好奇怪，以往教阿積士擅用新人嘅紅魔坦克Sir，照理喺現今大環境會係發圍良機，但相反無論用人、軍紀同布陣都有啲奇怪，冇咗大勇嘅海倫，福仔唔識踢中鋒照頂硬上，倒不如試下隊長般奴費南迪斯踢「偽9號」？突然又出一位只曾踢過英超5分鐘嘅新人奧馬科臣踢正選右中場，平平無奇，而子弟兵安東尼臨完場幾十秒先出場，主場輸畀富咸無謂到處找失敗藉口。紅魔嚟緊英足盃鬥森林、英超鬥曼城，又睇下坦克點玩法？