孟加拉之星
現今足球乜都擴大搵真銀至上，反而踢太公波心態各異，有啲球星當小菜一碟，不用踢出十成功力已夠贏；有啲就當衣錦還鄉，叉下電，返去各自聯賽再打拼。國際足協夏天大搞世冠盃，意見好壞參半，法國名將亨利話一年比賽多到決賽佢半場已離場，根本唔想睇落去，寧願做其他嘢陪下家人。只見打到入4強嘅三支歐洲強隊，皇馬、車仔同大巴黎，如今開季唔夠三個月，球員五勞七傷，錢真係唔易賺。
新世冠盃是非多，反而佢哋啱啱提出下年國際賽期將9月同10月合併，俾球員留喺國家隊幾個星期，連踢4場國際賽，球員心態同健康耗損機會減少，算係德政。頂級球星遊走非、亞比賽，再返歐洲都仲有私人飛機接送；但好似孟加拉中場主力咸沙祖靴里，喺英冠李城賺緊5萬鎊周薪，上年決定「棄英投孟」，名遠大於利。主客兩鬥港足後又會匆匆上路，呢個禮拜六好有機會列陣英冠主場比賽，今季幫「狐狸」爭返上英超，呢份敬業樂業咁想為國爭光嘅心態，佢係咪好波都好，都算係一個真球星。