賽事場數已逾半，歐洲隊勢力強大明顯，無論線路點走，歐洲連續7次喺自己地頭封王，機會甚高。
只見南美列強正艱苦作戰，巴西唔入波時嘅躁進，阿根廷獨靠美斯及哥倫比亞攞咗今屆第一紅牌輸壞第一場、非洲兵壯碩可惜場上表現極反覆，戰術執行能力不足；亞洲隊實力有限，日本先攞4分已是非常驚喜。反觀，歐洲大堆頭14隊參賽，但有幾隊確係搶鏡，兩輪後，4支入波最多球隊全屬歐洲隊；有好開始積累信心好緊要，估計分組賽埋單計，今屆佢哋有機會平近屆紀錄嘅10隊(98年)，入到16強。
對上兩屆世盃，都係分別得6支歐洲隊入到16強，今屆除咗幾支傳統歐洲強隊，包括死裡逃生嘅德國，應冇失拖躋身淘汰賽外，黑馬比利時、英格蘭同克羅地亞活力同入球板斧充足，形成一股強大勢力。唯一搗亂大局，可能係美洲嘅墨西哥，若以首名出線，或先對E組次名嘅瑞士；隊波有新星有速度有大將，只要「大Sam哥」門將奧祖亞穩陣多一啲，可走得更遠。