季前視為「鬧劇」嘅歐協聯，其實攞冠軍直入來屆歐霸分組賽，誘因唔細，有啲球隊恨唔到。事實上英超更計聯賽排名攞獎金，1個位置差距約2百萬英鎊，疫情下，今夏去各地掘金踢友賽又唔易，爭更高排名攞多啲cash最實際。只見英超中游分子近期特別神奇，白禮頓原本散晒，又可以打敗北倫敦雙雄、修咸頓輸完車仔6球又「變身」贏阿仙奴；賓福特得「丹麥之寶」加盟，近6場贏5場。入咗歐協聯4強嘅「狐狸」李城，季尾目標更鮮明，未來4仗喺聯賽兩鬥尾四嘅愛華頓，狐狸心意，隨時左右護級局勢。
另一支季尾搞局嘅可能係狼隊，近年一向係巨人殺手，守力媲美任何強隊；睇返佢哋季尾賽程，嚟緊對尾三般尼，最後兩場鬥利物浦同曼城，即係操控護級同爭標球隊嘅命運。狼隊排緊第8，如果中場大腦魯賓尼維斯傷愈，箭頭魯爾占美尼斯爭氣，攞到第7踢來屆歐協聯附加賽亦唔奇；始終英超太激烈，所謂傳統強隊都可以全無霸氣可言，睇曼聯同阿仙奴近績，想踢歐協聯都未必有資格。
