英超新星繁花似錦

歐洲轉會冬窗已關閉，各主要市場今年靜如深海，強如英超今屆嘅冬窗交易總支出，據報更只係上屆同期七分一；主因係怕財務違規，好似愛華頓扣完10分仲有手尾跟，籠罩部份本想出手班兵救亡嘅中下游球隊。其中狼隊想過同富咸爭借車仔前鋒布查，但怕負債爆數，來季被扣分；唯有喺首席射手黃喜燦爭緊亞洲盃下，繼續頂硬上，地莊人腳，試用彩虹。

英超交投市場特別淡靜，只因今季傷兵特多反造就新人多咗機會上位。大球會不假外求，彈起幾件新星將來用唔晒都可賣到好價錢；哥帥最叻用呢招，近年放貨唔手軟，盤數變靚，今屆又彈起域高路易斯同波比仔，其他新星包括紅軍昆沙同巴特利、紐記米尼、白禮頓嘅希斯活同上周鬥狼隊入絕殺球嘅紅魔邁奴(Mainoo)，新星繁花似錦，個聯賽發展更健康、更有朝氣。不過要提香港各大媒體譯「邁奴」，幾乎冇間一樣，多達6、7個中文譯名，秀氣嘅叫佢明奈；求其嘅可叫佢馬恩奧，佢上到位，英超好似又多咗幾個新星。