自2015至16年度「狐狸」李斯特城爆大冷封王之後，傳統Big Six重奪英超主導權，曼城及利物浦近兩季包辦一、二名；不過，今季英超開局「大」驚奇，愛華頓彈出固然因高質新兵對辦、升班馬列斯聯靠狂人領隊辣操，幾乎chur爆利物浦同曼城；阿士東維拉仲神奇，上屆死裡逃出，上仗竟然7破利物浦大門。要留意呢3支球隊，今季唔使打下周中起超密嘅歐洲盃賽，威力或如當年「狐狸」。始終強隊眾球星喺國際賽後歸來，要再練新陣又驚有人「中招」，又要每周雙賽飛來飛去，英超亂局或未止。睇番3支「黑馬」，未來數仗賽程唔算難打，其中列斯聯精兵唔多，全場壓迫踢法打道氣，長線未必頂得住；反而維拉換番啲高質本土兵，實而不華，評級大幅調升。
愛華頓有名帥、班底厚同專心聯賽，占士洛迪古斯固然搶鏡，新防中杜哥利好似當年「狐狸」封王功臣尼高路簡迪中場掃蕩咁勁。本周六「拖肥糖」鬥同市利物浦，紅軍陸續有人「中招」，行緊運嘅愛華頓係咪真奪標黑馬，好快有答案。