英超點止七國咁亂

英超開季，以為曼城比之前更無敵，點知受挫降班熱門狼隊，嚟緊鬥阿仙奴更好睇；利物浦成為VAR團隊同無能球證底下，最新輸波受害者，但下個受害者好快又會出現。英超入波最多球隊唔係曼聯，暫時係輪流「發火」嘅白禮頓、維拉同紐卡素3支非傳統Big Six，越亂越好睇。個個話足球比賽將5個換人名額變常態，必大利人強馬壯嘅強隊；但曼聯開季聯賽4敗，暫時排第10，今屆戰國變十雄，紅魔都只係落後緊曼城3場贏波分數9分；先有興趣係睇「坦克」另類嘅鐵腕管治，搞唔搞得掂一班英超大牌球星，最終大翻身。

由「鶴臣爺爺」帶領嘅水晶宮，全英超暫時用最少嘅18人，包括全場換2個夠揚威奧脫福，以弱勝強典範；另一支更要留意係韋斯咸，由另一英格蘭保守主帥莫耶斯帶領，只用過的19人，平均出場年齡為28.9歲(英超次高)，又要兼顧歐霸，但表現暫時係成個英超最正常，應贏則贏，只輸過俾利記同曼城，今屆歐霸分組賽水準弱雞，槌仔幫同利記有望攜手走得好遠。