喺現今頂級足球壇，功勞多數球員領，鑊就老細孭。車仔「沙利足球」睇怕快落畫、射手占美華迪速度減表現跌watt，但「狐狸」李斯特城決定撤換領隊佩爾，23個月來第四度揾緊新波士，繼續為另一個英超錦標發夢。
狐狸2016年神奇地英超封王之後，動盪同不幸未停過，其實接手呢類球隊唔易教，球迷永遠憧憬當年嘅神話，要求變高。佩爾17年接手想破局，大部分舊將已走，唯獨「李城之寶」華迪之後仲簽長約到佢35歲；李城管理層早就不滿佩爾，兩個國內盃賽相繼出局，球迷怨華迪等主將被收起，留力打英超。失勢嘅華迪更借勢表達唔適應佩爾嘅控球在腳戰術，又喺本月初輸俾曼聯後，疑似場中話佩爾係「蠢蛋」。其實華迪喺過去6場有份上陣嘅比賽，球隊1和5輸佢入得一球，仲喺對熱刺一出場即負責射12碼宴客，究竟係心態定狀態有問題？
李城差極今季都唔會降班，今晚佢哋喺主場鬥白禮頓，睇吓華迪會唔會好似曼聯嘅普巴咁，球會換領隊即刻變身救世主。