驅使你跑全馬嘅理由

「三隧三橋」嘅渣馬全馬魔鬼賽道，唔知跑友試過幾多次，嚟緊周日又係本地跑友「打大佬」嘅大日子；渣馬74,000個名額、分3個主要路程，當中全馬佔22,000個，入到挑戰組嘅跑手，繼去年後又可以爭1萬港元獎金，吸引力唔細。過去幾年疫情期間，賽道魔鬼之餘，報名名額大幅刪減，自己感覺沿路更冷清，打氣聲零星落索，幾小時賽程同自己內心戰鬥嘅感覺極強；除咗去到尾段長達2公里上斜嘅「撞牆名勝」西隧，非精英嘅跑友們，準備進入空氣唔多流通嘅隧道內，往往齊聲大叫，為自己、為大家一齊衝過去，係最難捱但最有feel嘅一段路。 

記得去年比賽仍設口罩令，如今終可自由出賽，適逢天氣預告今屆賽日天氣轉涼，對爭取PB嘅又好、想舒舒服服走長課嘅跑手，都係一大喜訊，報咗名嘅冇退縮嘅理由。長跑好公平，冇天才波，係長年累月嘅訓練成果，自己大約做到幾多成績，賽前應該心裡有數；只管好好接受一次「大考」，能跑就幸福，人生不停步，往後還有好多馬拉松，等你去挑機。