最近沉迷睇亞運，張家朗、蔡俊彥、梁千雨及何承謙嘅男子花劍組合奪得銀牌。比賽以外，訪問時嘅互動都好好睇，唔少網民感嘆，比起樂壇男團，佢哋先至真係有「團魂」，但我覺得兩者難以相提並論。
運動場上所有人目標一致，爭成績、爭獎牌。隊友贏即係自己贏；隊友失手亦會一齊承受壓力。呢種一齊操、一齊經歷高低起伏建立嘅感情，真係扮唔到。相反，樂壇男團要面對嘅環境複雜得多，因為每個成員都有個人發展，有人拍劇、拍電影、接廣告、出個人歌。資源有限，品牌代言得一個、男主角得一個、個人獎項得一個，表面大家係隊友，但現實又難免存在競爭關係。
另外，隊友之間，人氣高低會被比較，粉絲之間又互相拗撬，公司分資源又可能引起爭議。就算成員本身感情唔錯，外界都總係鍾意放大矛盾，日日追問邊個最紅、邊個被冷待、邊個資源最多等。久而久之，難以維持運動團隊嗰種完全一致嘅向心力。
不過，體壇同樂壇男團又唔係完全冇共同點。佢哋都長期活喺大眾嘅高要求之下。運動員攞過金牌後，好多人會覺得你應該一世都贏落去。只要有一次表現失準，即刻有人話退步、狀態跌咗、不復當年勇，好似大家落場都會永遠做得咁好。金牌之後嘅人生，就只可以不斷向上。樂壇偶像一樣，曝光率一少咗，就會有人話「過氣」、「已經唔紅」。好似紅唔紅只係睇一時，而唔係睇多年累積返嚟嘅實力同影響力。
競技有高低，人氣有起伏。無論運動員定偶像，都唔可能永遠維持喺巔峰。真正難得係經歷低潮時保持良好心態。男子花劍隊隊友之間互相支持、互相成就，嗰份純粹令人感動。因為大家見到唔單止係勝利，而係一班人真真正正為同一目標並肩作戰。呢種團結未必可以直接套用到樂壇男團身上，但至少證明一件事──所謂團魂，唔係口號，而係靠共同經歷、共同進退建立出嚟。