黃百鳴、張智霖(Chilam)、張繼聰、周秀娜(Chrissie)、陳靜(Dada)、譚耀文、栢天男、陳淑蘭、張達明、麥長青、陳庭欣等，前晚出席《家有囍事2020 》的首映禮，主持要Chrissie、Dada，在Chilam和張繼聰揀理想對象，Dada竟然棄男選女，Chrissie就大膽直認戲裡戲外都愛Chilam。
姊姊花Chrissie和Dada一同上台分享，Chrissie戲中在魔術室有一場全身只包著毛巾的動作戲，她說：「劇本覺得如果做到一定好靚，可能老闆知道我之前經常被打，今次安排我打返人；不過條毛巾好軟身，好難有力度咁打。」Dada則稱，以前和Chrissie合作過很多次，但都沒有對手戲，今次演姊妹大家都好有默契。主持提到戲中兩位型男Chilam及張繼聰，一英俊一幽默，兩位女演員會如何選擇，Dada笑言會揀Chrissie，因她身手了得：「同Chilam以前演過兄妹，所以佢係哥哥！」Chrissie則反高潮稱：「我會揀Chilam，從一而終嘛、戲裡戲外唯一的選擇！」
張繼聰花弗追Dada
張繼聰透露，戲中和Dada是歡喜冤家：「我戲入面無乜長處，主力運輸，千術、魔術都無我份，所以就好花弗咁追女仔。」主持提到戲中重現齊歡唱經典一幕，張繼聰形容老闆黃百鳴簡直是音樂監製，會執好大家每個音，連二胡部分都需要唱：「我要gel返當年周星馳個髮型頂住頂帽，拍完就要用無比毅力洗頭！」
Chilam指，於片場經常忍不到笑：「阿聰真係好搞笑，每日都好期待開工，打戲就交俾兩位女演員！」