莊思明自爆生日曾獲GD到賀。
韓國天王G-Dragon早前在澳門舉行一連三場的《G-DRAGON 2025 WORLD TOUR [Übermensch] IN MACAU》全場座無虛席，更吸引不少圈中人特登去「朝聖」，當中，大馬拿督千金莊思明與男友楊明都有到場，及後她在社交網自爆27歲生日曾獲G-DRAGON親自到賀。
貴為擁有十億身家的拿督千金莊思明向來生活富貴，家住山頂獨立屋豪宅，原來她當年27歲生日都非常威水，獲G-Dragon驚喜到場，而當時她卻不知道G-Dragon是誰，最後只和對方寒暄幾句就走。莊思明以長文憶起當年的情況：「話說當年我真係有眼不識GD，11年前我喺契哥嘅夜場『PLAY』度慶祝生日，當晚我契哥已經好興奮咁不斷同我講 “今晚有個生日大驚喜俾你哋啊” 當時嘅我都冇諗咁多，我只係以為佢買咗一份大禮物俾我，點知隔咗一陣身邊嘅朋友陸續發出尖叫聲，於是我就問佢哋發生咩事… 朋友：『GD入咗嚟呀！』我：『邊個係GD?』」莊思明續指當她正疑惑誰是G-Dragon時，契哥就帶了她與孖生家姐Mona到G-Dragon身邊，「同佢講今晚係我哋生日，佢非常有禮貌地同我哋握手，然後講咗句『Happy birthday！』嗰刻我所有朋友都向我哋發出極度羨慕嘅眼光，但可惜嗰陣時我真係唔知佢係邊個，所以我只同佢寒暄咗幾句，飲咗兩杯酒就返咗去同自己嘅朋友玩。」
莊思明指生日會後令她扚起心肝睇了很多BIGBANG和G-Dragon的演片段，「因為我好想知究竟當晚企喺我隔籬嗰位巨星係邊個！ 睇咗無數咁多視頻同訪問之後，我正式入咗坑啦，之後我仲同我阿嫂去睇BIGBANG吉隆坡嘅演唱會，真係太震撼啦，喺嗰個moment我極度後悔點解自己唔早啲入坑呢？如果早啲知佢係邊個，咁生日party嗰晚我應該唔會傾幾句偈就走囉。當年我係嗰位有眼不識GD嘅無知婦孺，今日我就係嗰位企到腳跛都要睇到演唱會出埋Roller先肯走嘅龍兵 。」
