Tyson Yoshi晚上出發，啟程意大利辦婚禮。 (娛樂組攝)
歌手 TysonYoshi(程浚彥)結束三場啟德體藝館演唱會之後，今晚(7日)啟程歐洲舉行婚禮，張敬軒、Madobii、Teddy和Gareth. T亦有同行乘搭同一班機出發，而老婆Christy則在生日當天，現身老公演唱會後，提早出發往當地打點婚禮。Tyson Yoshi於晚上許10時許，現身離境大堂，機場大樓聚集數百fans，大部分都穿黑白雨褸，分批站在check in和入閘處，在check in位置拉banner，有人更拉著紅底白字的橫額，上面寫了「熱烈慶祝程浚彥告別單身」，亦有人舉起寫上「邪教教主新婚快樂」紙牌。當Tyson Yoshi看到banner顯得十分尷尬，與fans大合照後，急忙收起banner。
爆破婚照竟與幪面超人有關
今日(7日)Tyson Yoshi公開與太太Christy一輯婚照，兩人盛裝上陣，身後竟出現爆炸效果，寓意愛得轟烈，Tyson在社交網留言：「畀大家睇吓上年影嘅婚紗相，多謝老婆陪我癲」。他解釋靈感源於在網上看到一對日本夫婦，戴著幪面超人腰帶拍爆破婚照，於是作為參考，滿足個人喜歡爆破的元素，「加上之前MV想爆破爆唔成，所以已有材料，真係天助我也。」他笑言不需要說服老婆Christy，因說好各按自己喜好拍一輯婚照，當日花了大半天拍攝，「本來book咗炸10次，因為要reset，花時間比想像中耐，最後爆咗6、7次，我問製片係咪可以退錢，好彩可以退，最後唔使10萬蚊。」雖然老婆没有「詐形」，但每次祖母和長輩通常會有微言，「不過老人家可能要等半年先睇到啲資訊，通常等過時過節。」
嫌林家謙隻蕉難食
談到獲張敬軒和林家謙玩「插水」，Tyson表示，「其實綵排時有問佢(軒公)，全場靜晒望住我，好似問我係咪傻咗咁，遠處睇到導演搖頭話唔好，我都諗大鑊，跟住佢話好嗰時，我哋全場仲驚，死啦點搞，跟住耳機聽到話保險可以加大額數。」其後，他也曾提出不如算吧，但軒公自言絕不介意好玩得，「我啲friend黑暗一面，嚟到我個場就爆晒出嚟，佢哋啲歌唔會玩到呢個效果，一播家謙啲歌，可能啲人讓開等佢直趴起地！」軒公在台上更自願兩度「插水」，他直言內心好擔心，「真係賠唔起比香港樂壇，要林家謙過去(英皇)，喺佢哋眼中林家謙比我更值錢。」問到如何處置林家謙送到「結婚禮物」香蕉，Tyson笑言：「食咗一啖，都唔熟，唔好食。」
慶幸唔係賺到盡
Tyson認為這次演唱會開心之處，是觀眾和嘉賓都抱著玩的心態入場。問到「插水」心得，他笑言，「以前underground啲fans知道向後傳，新fans好似開餐，又摸又搣。」但可以將「插水」文化帶到主流，不失為好開始。他自言日前完騷後有點感觸，心情複雜，「我以為自己會好開心，點知落台嗰下，有種解脫感覺。」開心感覺跟2019年首次開完騷大不同，他坦言：「如果你問我開3千人場，我係唔開心，但2019年你問我，我會答3個人、30個人或200人都一樣開心。」他自覺真的大個仔，認真工作，追求每件事要完美安排。當晚他亦立即與張敬軒「出火」訴心事，「我好慶幸我最後目標都係為啖氣，跟undergroud一樣，唔係為咗賺錢，就將個台縮到有幾細就幾細，擺得幾多張凳就擺，每件袍都係成本，俾每場一萬人咁貴唔造，賺盡去。」這是他完成3場演唱會最開心的重點。」
「包廂VIP」爆粗 Tyson直指好核突
至於網上流傳有「包廂VIP」爆粗投訴冇雨褸，Tyson在社交平台轉發該片段，直接抽擊：「VIP？What VIP？ I’ve no idea who they are.」他稱主辦單位只分得一個包廂，其他包廂與場館有關，「唔知同咩機構合作，就算有賣飛係去唔到我嗰度，當下佢哋嗌我係聽唔到。睇片先知咁無禮貌，喺公眾場所做啲咁核突嘅嘢，你自己承受啦。又唔係咩大事，原來只係冇咗兩件雨褸，要我幫你哋搵埋藉口你醉咗，有啲丟架。」
ADVERTISEMENT
20周年「全城撐本地消費3重大激賞」！ 即睇活動詳情！
