「亞視一姐」薛影儀（阿儀）呢期相信十分頭痕，有單襲擊罪在身上訴緊嘅阿儀，因為拍片而涉嫌無牌駕駛被捕，而亞視子公司又因為欠債而被申請清盤，所有藝人合約中斷。阿儀官非在身兼前路茫茫，但係自稱「香港抽水王」嘅林作，尋日就出post表示願意打救阿儀。
林作向阿儀發出邀約，表示「由於你依家恢復自由身，而且可能會坐下監，本人願意給妳人生第三次機會，簽你作為本人旗下第一位藝人，幫你變本加厲地紅落去」。不過近年大力發展保險事業嘅林作，就講明阿儀唔適合做保險，「不過捧紅人，我有一手，而且眼光獨到」。
最抵死係林作抽水抽埋去年同阿儀一樣參加選美而成為焦點嘅港姐「東涌羅浩楷」（利愛安），話佢「簽咗俾無綫後唔見咗蹤影」，但林作保證阿儀會「更無處不在」。文末林作再補多句「希望傳媒可以代我告知她：救星在此」。
阿儀喺亞視嘅經理人林寶玉，回應傳媒時提到儘量會保住阿儀。唔知阿儀最終會跟邊個？
原文刊登於 Yahoo娛樂LOL，am730獲授權轉載
