網絡世界流行二次創作，美斯個入球慶祝動作唔只受網友喜愛，連沙治奧拉莫斯都抽水抽埋一份。皇馬作客拿坡里，上半場落後0比1，C朗燥到唔知道有人拍緊片，兜口兜面同門將基羅拿華斯、後衛比比同馬些路講：「我哋完全唔識防守！」下半場以強攻代替防守，拉莫斯喺51分鐘頭槌建功追成平手，之後再以頭槌破門，但因皮球先掂到梅頓斯，所以變成對方烏龍波。入波之後拉莫斯抄美斯個打電話手勢慶祝，賽後仲心情靚靚咁話：「將入波送俾囝囝，有咩比用入波慶祝第100次歐聯上陣好呀？不過如果巴塞輸波出局嘅話，我會更開心。」拉莫斯今季已累積入咗9球，喺皇馬後衛入球榜方面以67球排第三。