曼聯開季3戰全勝，射入10球兼零失波，繼續排榜首。紅魔對住李斯特城上半場久攻不下，但下半場憑住後備入替嘅拉舒福特首先建功，摩連奴其後再換入嘅費蘭尼就錦上添花。睇到球隊人腳同摩帥戰術相互配合同發揮得宜，名宿傑斯都大讚球隊冇得輸。紅魔開季理想，神速康復嘅伊巴謙莫域，嚟緊亦會著上朗尼嘅10號波衫歸隊，意味住「呂布」將重回摩帥嘅大軍，現時紅魔前線已經有盧卡古、安東尼馬迪爾同「福仔」，會唔會人才過剩呢？其實球隊要應付多條戰線，又聯賽，又盃賽，仲有歐聯，可靠嘅人腳預多好過預少。同埋老大哥朗尼走咗，點都要有番個大佬輩坐鎮嘅，即管睇下摩帥會點分配啦！