英格蘭足球重燃希望？英軍喺6月已經贏咗U20世界盃，日前仲贏埋U17世盃，之前就只得巴西試過同年喺兩個年齡組別嘅世盃稱霸，真係威水，睇嚟呢班幼獅兵團確係有料到喎！當然希望呢班年輕人最終都可以喺英超獨當一面，甚至喺國際舞台發光發亮啦！今場U17世盃決賽，喺印度有成6萬幾觀眾觀戰，對住足球強國西班牙嘅U17都毫無懼色。上半場西班牙小將沙治奧高美斯梅開二度，第一球仲疑似越位，不過班幼獅喺落後0比2嘅情況下都冇自亂陣腳，心理質素真係幾好，而且好快就控制返大局，最終仲大勝5比2捧盃。佢哋今仗踢出水準之上，曼城小將科頓更獲選為整個賽事嘅最佳球員，前途一片光明。