相片提供：香港戲劇協會
香港戲劇協會(劇協)主辦的《第33屆香港舞台劇獎頒獎禮》，周一晚(4月28日)假灣仔碼頭的餐廳 Pier 1929 圓滿落幕。由頒獎典禮開始前，去到散場後的「圍爐吹水」時間，全晚我都在會場駐守，一邊透過電視直播觀看「場內」實況，一邊等候大會安排得獎者出來接受訪問。
你或許會好奇，為何大會不讓記者直接進入餐廳用膳區，即頒獎禮「會場」內採訪，反而在毗鄰店門的前廳設置「採訪區」讓大家等候？說到底是「土地問題」。因為今屆是劇協連續第二年失去藝發局資助，康樂及文化事務署亦「理所當然」沒有提供場地，限米煮限飯下只能盡做，實情去年(第32屆)也有相同安排，只是媒體或許覺得這些細節太過雞毛蒜皮，便沒有特別寫出來而已。
事實上，不僅劇場中人這樣認為，我亦作如是想──「舞台劇獎」對劇壇意義重大，時勢艱難，頒獎禮繼續有得搞已是難能可貴，搞得成更應裝香還神、感謝天父。未能在隔籬的「現場」見證說到底只是小事，真正令人感動的，是當晚透過大電視收睇劇協YouTube頻道直播畫面，依然能清楚看到，在資源緊絀的情況下，無論鏡頭調度、燈光配置以至提名片段的視覺效果，今屆製作都較過往更細緻更講究，而那些「穿牆」的尖叫聲與歡呼聲，亦凸顯台前幕後的團結氣氛。
當晚有許多畫面都令人笑住眼濕濕，分外窩心。比如「魚旦」袁浩楊憑《花樣獠牙》的演出榮膺首屆音樂劇「劇帝」(今屆新增設五個音樂劇相關獎項)，他的同班同學「阿炳」梁仲恆在旁高興得紮紮跳，二人隨之來個超過五秒的bro hug，轉個頭「阿炳」憑《餐廳》成為「最佳男配角(悲劇/正劇)」的得獎者，他們緊緊相擁的畫面再次出現。稍後時間，「大師兄」謝君豪頒發悲、正劇「劇帝」和「劇后」予老同學鄧偉傑(同為第二屆香港演藝學院畢業生)及老拍檔蘇玉華(二人識於微時，阿蘇說豪哥是她合作過最多次的男演員)；繼而阿蘇大聲宣布梁祖堯成為今屆喜、鬧劇「劇帝」，接着阿祖揭曉「老Best」邵美君奪得喜、鬧劇「劇后」後，二人與謝君豪「攬埋一嚿」合照留念。這些鏡頭面前的輪流轉，不就是本地話劇界薪火相傳的真實紀錄嗎？
台上還有不少話語教人熱血沸騰。譬如劇協會長「祿叔」馮祿德鏗鏘有力地說：「The show must go on！無論如何呢台戲一定要演落去！」又或者阿祖在台上喊住講：「企喺呢度，邊個攞(獎)都冇所謂，因為每一個人攞，我哋每一個人提名，或者冇提名嘅人都係開心，因為我哋真係好愛呢個行業！」這正是香港劇壇最可愛的地方：說話直來直往，不會轉彎抹角，熱鬧嘈吵，充滿笑聲(尤其豪哥負責頒獎的部分，真係笑到gap gap聲)，更充滿愛。只要有愛，就會有力量，再難過的關都能撐得過去。
我問蘇玉華，香港舞台劇獎對她有何意義？阿蘇說：「我一路都係支持劇協㗎，就算我有被提名、冇被提名都好，就算我冇去現場都好，我喺屋企都會睇直播。因為我覺得呢一個頒獎禮就係同我係好有關係，因為你會睇到，唔係淨係話你要唔要攞獎、有冇被提名，而係你見到呢一班從事戲劇(工作)嘅人，無論年輕嘅，啱啱畢業嘅同學，或者做咗十年，做咗廿年；或者我呢啲做咗卅幾年嘅，甚至祿叔可能大半世人都係奉獻咗俾戲劇。或者我嘅老師們，我嘅前輩們，佢哋都係用佢畢生嘅精力，或者佢哋對戲劇嘅嗰種眼界，或者佢哋對戲劇嘅嗰種專業嘅堅持，係一路一路咁將戲劇嘅發展，由七十年代、八十年代，一路咁樣行到嚟而家2025年。所以我覺得我哋更加要，唔好辜負佢哋一路嘅付出，我哋要好好咁樣去保守我哋呢一塊土壤！」
「豬仔」鄧偉傑接受訪問時坦言，香港舞台劇獎今年仍然能夠順利完成，他感到非常高興。我問這個頒獎禮對本地劇場界有何意義，他這樣回答：「(頒獎禮係)一個一定要有嘅項目嚟嘅，無論有幾多支持都好，我相信我哋同業一班人都會用好多唔同嘅方法，或者盡我哋嘅能力去將呢個獎繼續承傳落去。因為對劇界嘅朋友嚟講除咗係一個reunion之外，我覺得(無論)有份提名，有份參與，(以至)得到獎嘅都係一個好好嘅鼓勵，我哋係需要呢一份繼續燃燒呢個火焰嘅氣油嘅。」他特意向現時仍然留在香港，依舊願意買飛入場睇舞台劇的觀眾說了以下一番話：「我希望新一批嘅觀眾能夠支持多啲中小型劇團，因為佢哋而家面臨嘅生態上面呢係比較辛苦，好多時即係到到臨開騷前先至叫做可以見到個曙光。我唔希望所有演員做緊戲嘅時候擔心票房，(觀眾)能夠覺得有興趣嘅話早的咁多出去買飛，令到個團隊可以有更加安定嘅心去進行佢哋嘅創作。」
至於今屆大贏家風車草劇團，靈魂人物之一邵美君認為，香港舞台劇獎的意義在於：「我哋由演藝學院畢業之後，你有機會嘅話就可能做到演出啦，你冇機會嘅話，其實你有一個演出可以做到。其實你真係等緊一個認同，等緊一個鼓勵，然之後你先會更加發光發熱嘅，我哋就係咁樣成長。我都希望呢樣嘢(頒獎禮)可以繼續承傳落去，令到下一代嘅劇場人都可以繼續努力喺呢個行業去發光發亮。唔係淨係一個行業，我哋自己都相信，(在)劇場分享嘅嘢呢，係好有愛嘅，有溫度嘅，同你生活好近嘅，所以我哋好希望劇場可以繼續延續落去。」另一位「劇團Icon」梁祖堯則藉着今次訪問錄影，用鏡頭感激觀眾的不離不棄：「多謝！真係多謝！多謝你哋支持香港嘅舞台劇！多謝你哋支持香港嘅劇場！多謝你哋支持一班仍然努力想講，我哋覺得應該要講故事嘅人。多謝你哋支持我哋！」