哀阿積士
荷蘭足球，以往戰術前衛、新星輩出，為歐洲大聯賽源源不絕提供新星嘅兵工廠；如今當地人才凋零，荷蘭國家隊幾乎變成英超選手隊，現役最強射手迪比只係巴甲兵，球星搖籃嘅阿積士喺兩大戰線更好似沙包任打唔嬲。
荷甲一向係傳統三強嘅遊樂場，阿積士以往年年輸出精兵，又不斷搵到新血新星替補，喺轉會市場往往係大贏家；但再豐厚嘅資源都有被掏空嘅一日，自從三年半前教練「坦克」帶兵過檔曼聯後，球隊終被榨乾，戰績加快滑跌，未再攞過聯賽冠軍外，上屆季尾甩轆連失8分將冠軍拱手讓燕豪芬，最傷士氣。今屆季初情況惡化，內部管治混亂，歐聯4戰全敗包尾後，前名將教頭希汀加落鑊，「坦克」拒絕再接手，老帥費特格廉據報會頂檔至年尾歇冬，堂堂歐洲大會前程未卜。球隊戰績繼續惡化，啱啱聯賽主場1比2反輸下游精英隊累計3連敗，比賽水平有啲似英冠英甲，難得仲有五萬幾人撐場，起碼證明荷甲冇英超咁多勝利球迷。隊波今晚歐聯迎戰賓菲加，唔通呢場先嚟反底？