巴洛迪利又領紅，累計今季第三張紅牌，同AC米蘭中堅柏列達、巴斯蒂亞嘅卡侯沙斯並列今季歐洲五大聯賽中最「紅」球員。其實佢轉投尼斯之後，13場法甲攻入9球，表現都幾對辦，但係仍然不時都有報道指佢唔係咁好老脾，好似之前俾巴斯蒂亞球迷羞辱完之後，佢竟然「問候」巴斯蒂亞主帥嘅母親；佢嘅隊友伊沙域亦覺得佢太情緒化，輸波之後仲會埋怨隊友。「巴神」脾氣暴躁始終都改唔到，而且壞孩子形象太深入民心，其實好蝕底。今場同對方球員爭頂時，發生肢體碰撞之後被罰紅牌。手肘未有過高，亦冇惡意侵犯動作，只係疑似言語間激嬲球證而被逐。如果係真嘅，就再一次印證佢嘅不智喇！