球場失意係家常便飯，幾勁嘅球員都會經歷過，朗尼今季喺英超上陣17場入得兩球，相信會創下自己新低。執教中超球隊天津權健嘅簡拿華路承認同佢斟過下，但唔會有下文；摩連奴口講就話唔會迫朗尼走，但問到佢係咪去中超，就叫記者問番當事人。其實有錢未必一定開心嘅，泰維斯就係一個活生生嘅例子，獲全球最高周薪61.5萬英鎊效力上海申花，但短短3個月就想返阿根廷。之前亦踢過曼聯嘅法卡奧同查維亞靴南迪斯，都曾經低沉過，法卡奧今季重拾射門鞋，喺摩納哥上陣28場入22球，但之前都捱過一段幾近放棄嘅艱苦時期。現時効力利華古遜嘅小豆，經過11場德甲入球荒後，連續3場都有士哥，近兩仗都梅開二度。條路點行好？唔好放棄，就總會有出路。
# # ##