美斯對切爾達慶祝入波時，唔做平時指向天動作，而做咗個打電話手勢，到底有咩含意呢？美斯係望住看台做，係咪叫球會高層好打俾佢傾續約呀？定係提傳聞中嘅巴塞下任主帥森柏奧利同佢電聯？定係想call周中歐聯對手巴黎聖日耳門，叫佢哋小心啲？原來真係諗多咗，美斯話佢個踢巴塞U16嘅姪仔奧古士甸成日都打俾佢，但因為忙於備戰而未能接聽，所以美斯想將個入球送俾當時坐喺觀眾席嘅姪仔。美斯嘅表現對球迷亦好有交代，兩入球兩助攻，展示出盤扭技術同超卓把握力，兩大足球網站都俾美斯今場表現10分滿分。另外，美斯嘅西甲生涯遠射入球已達50球，多過第二位嘅C朗9球，而且第94次喺西甲梅開二度，亦都係紀錄。美斯嘅個人能力，仍然係巴塞嘅最佳戰術。