熱刺有錢擴軍來勢洶洶，不少英國博彩莊家已將佢哋調熱至英超第三熱門。英超Big Six上屆喺英超獎金榜排名第1嘅利物浦(1.524億英鎊)至第6位嘅阿仙奴(1.421億英鎊)，相差約1,000萬英鎊；要鬥搵得多就要喺歐洲賽分勝負，所以熱刺來屆成功重返歐聯，加埋獲母公司ENIC注資1.5億英鎊，今夏買人出手特別爽快。李察利臣「升呢」踢大會，期待值不遜另外兩大箭頭新貴、曼城艾寧夏蘭特及利記達雲紐尼斯；未踢過英超始終有懷疑，但李察利臣自細喺英超上位，雖然成日俾人話場上詐傷同挑釁對手，但火爆脾性啱干地要嘅激情，而且「李察」喺巴西國家隊前鋒排名，已係首席尼馬之後，級數不用懷疑。熱刺再簽埋老牌翼鋒比列錫，現時坐擁6、7位前鋒可用，雄心萬丈；最大路當然用哈利卡尼居中、上屆英超神射手老孫同李察利臣分列左右兩翼，又或者輪換踢單箭頭；但英超強隊中難得有兩位頭槌好、速度高嘅中鋒壓陣，一向保守嘅干地既得高層信任押重注，會唔會試下雙中鋒陣式衝擊「藍紅」之爭兼冧客？
