舊年一部《你的名字。》打破香港日本動畫片悶局，以逾2,500萬港元票房超越16年前《千與千尋》紀錄，榮登本土最高票房日本動畫片。但紀錄嘅嘢，係要嚟破嘅，如今又一部日本票房逾23億日圓嘅《聲之形》於下月6日上映。此片唔止本土票房超越《你》，更奪得應屆「東京動畫獎」電影類最佳動畫及最佳編劇兩個大獎。
被指歧視
故事改編自漫畫家大今良時於《週刊少年Magazine》連載嘅同名作品，由於內容被指有歧視聽障人士成分，曾一度被禁止刊載，但經編輯們爭取後，終於成功面世，仲獲得多個漫畫界大獎，包括手塚治虫文化獎新生獎、「這本漫畫真厲害！」2015年男生編第一名。《聲》片女主角係聽障轉校生西宮硝子，男主角則係百厭仔石田將也，佢曾經帶頭欺負西宮，最後卻反被孤立，甚至萌生輕生念頭，驅使佢去搵硝子道歉。