邊有公司用haters做吉祥物？
江湖傳聞，有人問過ViuTV位魯生，旗下咁多藝人佢最鍾意邊個？魯生答係Sound Bear。呢個傳聞令我留意多咗ViuTV嘅吉祥物，大家又有冇留意？繼Sound Bear、Sound Choice後，ViuTV新嘅吉祥物脫離可愛嘅啤啤兔兔，改用刺蝟，叫Sound Hey「生氣」。
邊有人用haters做吉祥物？不過，其實亦反映咗ViuTV嘅成長路。2016年開台前，ViuTV其實冇乜人識，亞視永恆、王維基冇牌、大台節目質素先係討論點，慢慢ViuTV同Sound Bear一樣逐漸變得人見人愛，記得嗰副麻雀個個搶住要。8年過後，MIRROR、ERROR同COLLAR等出現，ViuTV多咗人識，多咗fans，同時haters亦隨之增多，並分幾大類︰
1.憎MIRROR嘅人︰成亦蕭何，敗亦蕭何。MIRROR為ViuTV帶來高鋒，但同時亦附帶一班haters。MIRROR未紅之前就笑佢哋肉酸老土東莞feel，紅咗又話佢哋冇實力。總之有幾多fans捧，就有幾多haters踩。
2.唔接受新嘢嘅人︰ViuTV由幕後製作、幕前演出，再到班觀眾都係年輕一代為主，節目同藝人嘅風格都同傳統唔同，當然新嘢唔一定好，但係總有一班人係一見到新嘢就會鬧咗先，可以話係世代矛盾，當然更大嘅原因係，新嘢亦自然會衝擊傳統嘅利益。呢個，明就明。
3.恨鐵不成鋼嘅人︰好多人其實對ViuTV寄予厚望，嚴格嚟講佢哋唔係haters，係視評人，真心想ViuTV同整個電視行業好嘅，要做好一個媒體其實唔易，好似有啲網台曾經叱咤一時，依家已經唔知去咗邊。有人同我講，吉祥物「生氣」背後嘅意義幾深遠，反映ViuTV其實珍惜呢種「hater」，唔會唔理之餘，仲會入埋ViuTV，一齊成就將來。
每間公司都有周期，起嘅時候，有隻Sound Bear自爆同大家開心，到公司大咗，有haters同難關，一隻「生氣」，令人覺得ViuTV嘅核心價值仲響度：大方、玩得、貼地嘅公司先俾用呢個名。講開又講，ViuTV明年節目當中，有一個係叫班藝人學跑馬拉松，個節目名都好viu下，叫《公司冇逼我跑馬拉松》。