特首選戰開鑼，又再聽到眾多候選人落區聽民意，努力讓自己汗流浹背，盡力擠出眉頭深鎖的表情，透過傳媒把口去話俾大眾知道自己有幾深入民心。
無論邊一屆特首都成日話要多聽民意，但基本上五年只有一次，唔到參選唔到要去爭取連任都唔會落區聽民意，一旦當選後就大條道理以公務繁重為理由將落區聽民意呢個動作拋諸腦後，將聽民意嘅責任外判給其他司局長及其下屬就算。翻查新聞就不難發現他們當選後唯一再次落區的就是為了「謝票」。而基本上香港七百三十萬人當中，只有一千二百人先有票喺手。如果特首真的要謝票，其實只要喺telegram開一個群組說一聲多謝就已經夠。不必勞師動眾浪費金錢各區巡遊，假扮得到市民認同及支持，因為現在有票喺手而又投給你的，都不會站在街頭等你的巡遊隊伍跟我說一聲多謝。
當然我們也常常聽到特首詭辯，說當選後很多時都有繼續落區繼續聽民意，只是傳媒拍不到，過往有特首更高傲的說「唔係等有鏡頭我先至落區」。但如果真係咁有型有款嘅話，那為何競選時候落區聽民意又要通知傳媒採訪呢？如果喺鏡頭背後你已經常常落區聽民意，理應跟地區組織十分熟落，何解傳媒又會拍到一些你與他們好似初相識的畫面出現？
到底乜嘢係「落區聽民意」？到底應該點樣落區聽民意？再坦白啲，明明我哋呢七百三十萬市民都無票喺手，你有需要落區咩其實？你落區，只係將投進你口袋的選票美化神聖化，讓投給你的人自我感覺良好。而說到底，你落區所聽到的民意聲音，極其量都只是到你的競選籌碼罷了。選舉過後，聽過的民意都再沒有用。