倫敦近郊的普羅旺斯

每年一到六月底至八月，便是薰衣草盛開的季節，有不少家庭、情侶、閨密專誠去薰衣草田影相、嘆下午茶，來個半日「法南」小旅行。上星期就去了位於Surrey的Mayfield有機薰衣草田，它離倫敦市中心只有15英里，離遠已望到一大片紫海，無論遠看或近看都賞心悅目，遇上藍天白雲的好日子，用手機拍已很美，完全不用執相或filter。

上次來這裡已經是2017年，記得當年無入場費，現在百物騰貴，英國通貨膨脹率達40年新高，五月更高達9.1%，這個時勢好難有機會免費入場，Mayfield現時成人入場￡4.5包停車場費，定價尚算合理。它雖然不及Kent的Castle Farm大規模，但地點方便，薰衣草田位於倫敦的zone 5，持Oyster Card或Travel Card都可搭公共交通工具前往，無車人士都容易去到。 

去得薰衣草田，當然為了影靚相，首先要揀個陽光普照的日子，再穿上一身白色或米色衣服影就最完美，我在現場見到有一家四口襯晒著白色衫來影相，還戴上草帽，要影到有如普羅旺斯的靚相真係話咁易。場內有不少影相位，薰衣草田上有電話亭、涼亭、花架等裝置可供拍照，你亦可以自費￡2.5(車程約15至20分鐘)搭紅色小火車，順便繞薰衣草田遊一圈。如果不怕污糟，坐在地下「低炒」影都靚爆，但要注意田上有許多蜜蜂採蜜，牠們並不針人，只要小心避開就好了。

影完相後，可以坐低休息下和醫肚。露天咖啡店有各式各樣的薰衣草甜品和飲品，試過招牌薰衣草英式鬆餅(￡5配果醬及clotted cream)，味道算不錯，薰衣草味清新不搶喉，質地有點像光酥餅。不過朋友試的薰衣草lemonade就大叫有怪味，伏味甚濃，建議最好挑戰其他如薰衣草檸檬蛋糕、朱古力牛油曲奇、雪糕、凍茶及無酒精雞尾酒等。最後可以逛逛精品店，由薰衣草炮製的果醬、曲奇、蜜糖、潤唇膏、精油、蠟燭、枕頭噴霧等一一齊備，香味天然，輕輕地用來做手信很不錯。

Mayfield Lavender Farm & Fields

地址：1 Carshalton Rd, Banstead SM7 3JA
開放時間：即日至8月31日 每日 9am-6pm (私家車最後入場時間為5:30pm)
入場費：成人￡4.5，14歲或以下小童免費(包停車場費）
交通：火車從London Victoria搭到West Croydon，再搭166巴士直達
電話：+44 (0) 7503 877707
網址：https://www.mayfieldlavender.com