曼城落實由皇馬簽入巴西右閘丹尼路雷斯，簽約5年，轉會費達2,650萬英鎊。曼城體育總監碧格利斯坦話丹尼路係一名通天老倌，中、後場都應付到，令哥迪奧拿來季有更多選擇。真係？佢會唔會記錯丹尼路仲喺波圖夥拍阿歷士辛度，喺邊路所向披靡嘅時期呀？丹尼路喺2015年以3,150萬歐元由波圖高價轉投皇馬之後，踢咗兩季都唔多對辦，球迷仲幫佢起咗個花朵叫「放題路」，因為佢經常好似放題咁被對手扭過同戲弄；雖然經常上前助攻，但通常回唔切防，表現唔好之下慘變水貨。「藍月亮」喺國冠盃淨吞曼聯兩蛋，後防表現唔掂當，唔通哥迪奧拿諗住以毒攻毒？丹尼路話有其他球會向佢招手，但都係想同哥帥合作，佢哋有機會擦出火花都未定嘅，始終踢波係人夾人緣！