阿仙奴終於威番次，主場2比0贏曼聯，後備席嘅球員仲一齊食麥堤沙慶祝，真係當紅魔係朱古力咁𡁻！講開兵工廠，依家効力紐卡素嘅杜韋加爾係佢哋青訓產品，佢啱啱做功臣，帶領「喜鵲」奪得英冠冠軍，下季重返英超。雖然杜韋加爾離開阿仙奴之後，都係踢啲低組別聯賽球隊，不過其後轉投水晶宮，終於可以踢英超。佢去年夏天以大約1,000萬英鎊由水晶宮轉會到喜鵲，聽落都唔平，再加上隊中已經有唔少前鋒，本來唔係太多人睇好，結果佢上陣32次入咗23球，就係實力嘅最佳證明！本來差少少做埋英冠神射手，下半季唔好彩斷斷續續因傷缺陣，希望佢keep住團火上英超再搏過啦！
