紙皮回收係唔少公公婆婆嘅收入來源，突然話唔再回收，即刻一地都係紙箱，無人問津。世事總係有起有跌，有時會令人措手不及，上季皇馬稱霸西甲同歐聯，今季先贏兩個超級盃，西甲開咧亦輕取拉科魯尼亞3比0，但之後連和兩場，夾埋入咗6球失3球得5分。同巴塞一拍埋，就可謂相形見絀，巴塞4戰全勝，入咗11球而只失1球，以12分排榜首。施丹都好頭痛，因為占士洛迪古斯、艾華路莫拉達同丹尼路等先後離隊，但冇補給星級球員，只係引入咗批青年新兵。當C朗、賓施馬、馬些路同沙治奧拉莫斯等成籮正選球員輪住傷同停賽時，仲要應付聯賽同歐聯，咁資源分配就真係考起教練喇！好彩佢哋上周中喺歐聯分組賽以3比0贏尼科西亞，叫做振奮一下士氣啦！