球迷記性好好，如果問費蘭尼幾時令曼聯失分，相信紅魔迷一定可以秒回！但係無論大家點樣狂插佢，摩連奴都冇放棄佢，佢亦冇令摩帥失望。聯賽盃4強首回合，完場前10分鐘費蘭尼後備入替，換走先開紀錄嘅桑馬達，奧脫福球迷竟然噓爆自己人？因為大家都好怕佢再次犯錯，覺得摩帥嘅換人調動危險性太高。不過，身高6呎4嘅「爆炸頭」接應達美安傳中頭槌一頂破網，入波之後佢即刻衝去攬住摩帥，個畫面要配廣東歌嘅話，一定係「無聲仿有聲……緊緊擁抱來代替講話好嗎」，真係溫情到一個點。結果摩佬都成為大贏家，球隊2比0贏侯城，半隻腳入決賽，佢嘅大膽同獨到眼光，亦贏得球迷同球員嘅掌聲。