真係火燒連環船！西班牙執法部門好努力咁追查球圈逃稅事件，繼美斯同C朗之後，曼聯教練摩連奴都成為被狙擊目標，不過所涉及金額嘅銀碼就細好多。佢涉嫌於2011至12執教皇馬期間，隱瞞約330萬歐元嘅肖像權收入，情況同C朗有啲雷同，都係喺海外設立離岸公司，從而隱瞞肖像權收入，而且咁橋摩帥同C朗都係同屬佐治文迪斯經理人公司旗下。之前美斯被判逃稅罪名成立，原本要被判監禁21個月，不過最後交罰款了事，唔使坐監。比比同迪馬利亞等，亦曾被西班牙法庭起訴逃稅，都係交罰款了事。錢解決到嘅，就唔係問題，係形象受損啫！平時球星們都有做開善事，唯有之後再做多啲啦！