Ad Block Ad Block
娛樂
2022-11-30 16:45:20

疫情之下 內地戲院奇招自救 收錢俾打工仔入場瞓晏覺

分享:

電影LOL︳疫情之下 內地戲院奇招自救 收錢俾打工仔入場瞓晏覺

上星期,英皇宣布將內地經營嘅英皇UA影城7間戲院全線結業。根據英皇財務報表,內地附屬公司喺今年上半年錄得淨負債1億8200萬,可想而知內地戲院市道有幾艱難。

海外大片難打入中國市場

內地新冠疫情反覆,防疫措施時鬆時緊,有時甚至要封城封區,對於國民生活好大影響,更何況係非生活必需嘅娛樂事業。而且近年海外大片難以打入中國市場,本土國片題材又有好多「紅線」,大大減低觀眾入場意慾。內地人氣王王一博主演、本來備受睇好嘅《長空之王》臨時撤檔,今年十月國慶檔票房收入大減,可見「技術原因」對電影上畫帶來嘅不確定性,唔止片商變「片傷」,院商一樣咁傷。

午睡兩小時收12.9人仔

但係咁大個場,即使唔開門做生意都要交租畀電費。各個營運商都相繼出招自救。呢期內地網路話題之一係成都有戲院推出「午睡服務」,喺星期一至五中午12至2,開放放映廳俾人入場眠一眠,收費人民幣$12.9或$18.9,包一個眼罩,「貴價飛」仲有熱飲。負責人受訪時表示,戲院附近唔少上班族返工,之前都有人買飛入場恰一陣,於是索性推出「午睡服務」。

電影LOL︳疫情之下 內地戲院奇招自救 收錢俾打工仔入場瞓晏覺

 

除此之外,內地戲院經營商萬達將戲院呢個空間變得更多元化,例如同創作工作室合作,喺戲院玩「劇本殺」!萬達亦出租場地俾人搞talk show、相聲甚至音樂會。呢期世界盃,開放俾人睇波呢啲,內地院商梗係有搞啦。

Ad Block

不得不佩服內地院商嘅創意,希望佢地都捱得過呢個唔知有幾長嘅寒冬。

電影LOL︳疫情之下 內地戲院奇招自救 收錢俾打工仔入場瞓晏覺

原文刊登於 Yahoo娛樂LOL,am730獲授權轉載

Ad Block
請接受以下私隱政策及免責聲明,以示你同意am730內之私隱政策及免責聲明。了解更多
接受