鍾嘉欣昨日到杏花新城出席活動,更落場瞓身與現場小朋友挑戰忍者關卡!嘉欣笑指自己工作時難以放低媽媽身份:「頭先兩個小朋友鬥快搶波波嗰陣,佢哋好投入!自己不斷諗住要提佢哋玩還玩,要小心啲,慢慢嚟!爭啲就忘記咗呢個係比賽。但係見到佢哋可以透過遊戲不經不覺就可以出一身汗,玩得好開心之餘又可以將運動融入生活,多多鍛鍊身體,對小朋友嘅健康成長真係好好呀!」
被問到爸爸返工自己「一拖三」是否好辛苦,嘉欣即笑笑口甜到漏話:「唔會好辛苦,同先生都以小朋友行先,都會分工做家務,唔會我一個做晒,好似我返嚟做嘢時佢就會照顧小朋友。小朋友要同爸爸媽媽都相處多啲,唔可以剩係依賴一個。」
她在活動上又分享與仔女相處的心得︰「我同先生都鍾意同小朋友一齊體驗新事物,等小朋友願意多嘗試、勇於接受挑戰。而且我哋平時都多做運動,健康啲人都自然會KEEP得靚啲。小朋友見到我哋做運動都好自然會想跟住一齊做。」
她表示今次回港逗留時間相當短,只留港一日半,除了出席活動,還要處理私事。提到她在加拿大的地址被公開,她表示無奈,但已習慣,只想過簡單生活,希望可以有私隱生活。問到何時回港拍劇,她稱到細女Anika兩歲時才考慮,但預告今年內會推出新歌,內容是鼓勵大家及發放正能量。