拜仁放生羅拔

年初冧莊世界足球先生的羅拔利雲度夫斯基，不想留隊，拜仁亦係時候放手，敢去擁抱時興嘅三箭頭快速靈活多變踢法，再與歐洲列強一較高低，一洗近2屆歐聯8強出局的頹風。就快34歲嘅羅拔仔想攞多份肥約收山，又聽聞巴塞有興趣，拜仁根本唔使騰雞；事關國內大敵多蒙特放走艾寧夏蘭特後，即找回只得1米8嘅德國新星艾迪耶米重建，前線踢法將會大變。再睇返德甲上屆10大射手，最叻嘅德國人係羅拔仔嘅隊友基拿比，都係排第7；國家隊前鋒人才凋零同拜仁不再稱王歐洲係事實。作為德甲10連霸嘅拜仁，不能再倚賴羅拔仔屆屆入3、40球去爭標，何不轉用基拿比做重心、仲有利萊辛尼、京士利高文、穆斯亞拿加快進攻嘅速率，同多蒙特齊變求突破。老賓施馬嘅成功，唔知係咪巴塞想擸羅拔仔嘅主因；但呢隊波成日傳出要隊內老將減薪，加埋前鋒爆棚，季尾達標後士氣已麻麻。若加入「大哥級」嘅羅拔仔，隨時重蹈曼聯上屆加入C朗嘅覆轍，最終個人入球滾滾還是一事無成。